portada

instalaciones

situación

servicios

C. Oportunidades

hemeroteca

Reportajes

Necesidade e carencias por un comercio de calidade

Unha enquisa elaborada por encargo de ACIGU sinala as necesidades e carencias da Guarda para conseguir un comercio de calidade

De esquerda a dereita: Antonio Reguera, Carmen García, José M. Domínguez e José Mª Seijas

 

A Guarda, 15 de maio de 2008. A presidenta da Asociación de Empresarios da Guarda (ACIGU CCA), Carmen García Braga, presentou onte (14/05/08) as conclusións do estudo que sobre o comercio e a hostalaría local, realizou a empresa Estrategias de Mercadotecnica, por encargo do mencionado colectivo de empresarios guardeses.
            Acompañaron á presidenta dos empresarios, o alcalde da Guarda, José Manuel Domínguez Freitas, e os presidentes da Federación Galega e Provincial de Comercio, José Mª Seijas López e Antonio Reguera Repiso, respectivamente.
            Ao acto acudiron distintos empresarios da Guarda, ademais de concelleiros do PSOE e do Partido Popular.
            Carmen García explicou que este estudo quere analizar as necesidades comerciais e a contorna comercial local, pero ademais, insistiu, trátase de conseguir para os establecementos da Guarda a Norma UNE 175001, sobre calidade de servizo para o pequeno comercio.
            O estudo realizado por Mercadotecnia centrouse en tres aspectos: iluminación, aparcadoiro e accesos á Guarda, e a partir da enquisa realizada aos xerentes e administradores do comercio e a hostalaría local, obtivéronse as seguintes conclusións: A Guarda precisa mellorar a iluminación das súas rúas; os enquisados demandan un aparcadoiro subterráneo para facer fronte ás dificultades de aparcadoiro que agora mesmo existen; é preciso un maior control no horairo de carga e descarga, incluso a súa adaptación á situación actual; o acceso á Guarda, desde Tui, debe ser mellorado; para  incorporar á muller ao mundo laboral é urxente a posta en marcha do parque industrial; debe continuarse coa eliminación de barreiras arquitectónicas e, neste punto, concretáronse as dificultades existentes para acceder  á Praza de Abastos, cuxa segunda planta dificulta o acceso a aquelas persoas con problemas de mobilidade. Parques infantís ben situados e zonas verdes, así como unha alameda adaptada á súa finalidade, que leve a retirada do lousado, resume o contido das conclusións.
            O presidente da Federación Galega de Comercio, José Mª Seijas, referiuse á situación de crise pola que pasa o comercio, que se manifesta na baixada de ingresos. Destacou o peso específico do sector comercial na economía galega, que representa o 16 por cento do PIB e xera o 14 por cento do emprego.
            Prapararse na informatización, traballar a calidade e ser capaces de cubrir todas as necesidades dos consumidores, son retos que ten que superar o sector para avanzar. Referiuse, tamén Seijas López, á Norma UNE 175001, pero tamén aos requisitos máis esixentes do Selo de Calidade, como garantía para o consumidor, recoñecementos que deben ser obxectivos dos comerciantes.
            Antonio Reguera insistiu na idea de crise que sofre o sector, mencionou que o euro encareceu a vida, e os ingresos minguaron. E valorou, o presidente da Federación Provincial de Comercio, A Guarda, á que denominou capital do turismo gastronómico de Pontevedra pola calidade dos seus produtos e a exquisitez da súa mesa.
            Pechou a quenda de intervencións o alcalde da Guarda, José Manuel Domínguez Freitas respondendo a algunhas das cuestións mencionadas por parte dos intervintes que lle precederon no uso da palabra.
            Sinalou o interese do goberno local pola promoción turística da Guarda, pondo como exemplo o recentemente presentado Plan Director de Turismo.
            Respecto ao aparcadoiro subterráneo, adiantou que están traballando no seu logro, concretamente na rúa Manuel Álvarez, unha vía que é competencia da Consellería de Política Territorial, á que solicitaron a súa reversión ao concello, pero que tamén necesitará unha modificación no PXOM, cursando á Xunta de Galicia a necesaria corrección para que emita o informe favorable e levar este tema a Pleno, seguindo os trámites que marca a lei neste tipo de actuacións, para construír un aparcadoiro subterráneo no tramo da rúa Manuel Álvarez comprendido entre a Praza Avelino Vicente e a baixada a Enrique María Sesto.
            Respecto da Alameda, Domínguez Freitas dixo que tras a humanización da rúa Transversal Troncoso, están agora traballando para remodelar a Alameda, téndose solicitado subvencións para unha mellora deste espazo público, dado que o concello non ten os recursos suficientes para acometer un proxecto xonfondos propios.
            Ao referirse ao Parque Industrial, que compartirán os concellos da Guarda e O Rosal, o alcalde explicou que tras a entrevista mantida con Daniel Pino Vicente, director xeral do Instituto Galego de Vivenda e Solo, esperan que a finais do verán se inicien as obras de construción do mesmo.
            Finalmente, respecto aos parques e zonas verdes, José Manuel Domínguez Freitas sinalou que o gran parque co que vai contar A Guarda, será o Castelo de Santa Cruz, que será realidade despois de que a Consellaría de Cultura materialice o proxecto de creación dun Centro de Interpretación das Fortalezas, habendo asinado, en 2006, un convenio coa institución local.
            Coas palabras do alcalde concluíu a presentación do estudo presentado por ACIGU sobre o comercio local.

Entidades financieiras, como Caixanova, e do sector empresarial, como Espaderos Guardeses, déronse cita na sede de ACIGU para coñecer o informe e conclusión da enquisa sobre as "Necesidades e carencias por un comercio de calidade"

 

En primer termo a concelleira de Turismo e Facenda, Montserrat Magallanes Álvarez. Entre os presentes, Elicio Magallanes, primeiro presidente da Asociación de Empresarios da Guarda

 

As autoridades locais e os representantes das federacións de comercio coa presidenta de ACIGU, Carmen García